નિર્દોષ ગુનેહગાર is with Pravin Miyaatra and 14 others.
April 21, 2013 ·
ગ્રહોની દશા અને માણસ નડતર
વર્ષો પહેલાં...
ઊબડખાબડ સાંકડી ગલીના છેક છેવાડે આવેલ મહોલ્લાની માલીપા, છેક ખૂણામાં આવેલ ખંડેર મધ્યે અમે ત્રણેય ભાઈબંધો ચાયની ચુસ્કી ભરતા-ભરતા અમારી અલૌકિક મોજમાં અલગ-અલગ વિષયો પર વાતો કરતા.
મેં ઘણા લોકોને ગ્રહોની વીંટી પહેરતા જોયેલા હોય, મારા મનમાં હંમેશા એક સવાલ ઘુમરાતો હતો કે—શું ખરેખર આકાશની પેલે પાર પોતાની જ મસ્તીમાં ઘૂમતા ગ્રહો માણસોને નડતા હશે? બસ, મને વિષય મળી ગયો એટલે મેં આ સવાલ બંને ભાઈબંધો સમક્ષ રજૂ કર્યો. મેં કહ્યું, "યાર્ર, આ ગ્રહો શું ખરેખર માણસોને નડતા હશે?"
અજ્ઞાનીએ કહ્યું, "પરીયાઆઅ... 'અજ્ઞાની' માણસો હંમેશા ગ્રહોને દોષ દેતા હોય છે, પણ હકીકતમાં તો માણસોને પોતાનો સ્વભાવ અને કર્મો જ નડતા હોય છે..!"
અમને અચાનક ગ્રહો નડ્યા નહીં, સામા જડ્યા!
બસ પછી અમે એ જ ગ્રહોની વાતો કરવા લાગ્યા, જે માણસોને નડતા નથી તે જ ગ્રહોની; વર્ષો પહેલાં મધરાતે ખંડેર મધ્યે ચાયની ચુસ્કી ભરતા-ભરતા કરેલી તે જ ગ્રહોની વાતો!
વાત-વાતમાં, વાતના અંતે ભાઈબંધ ‘અનંતે’ ગ્રહોની વ્યંગાત્મક વાર્તા કરી...
અનંતે કહ્યું કે, હવે ગ્રહોની ‘દશા’ બેઠી છે!
મંગળ, બુધ, શુક્ર, ગુરુ અને શનિ...
જો કે રવિ મજામાં છે કારણ કે રજા છે, પણ બાકીના આ બધા ગ્રહોની આજકાલ દશા બેઠી છે.
ખૂબ માઠી છે, ખૂબ જ માઠી છે!
ઘણા સમયથી આ બધા ગ્રહોની સ્થિતિ ડામાડોળ છે, બધા હેરાન-પરેશાન છે.
ગમે ત્યારે ગમે ત્યાં ભટકાય છે, ગમે ત્યારે ગમે ત્યાં અટવાય છે, પોતાના કાર્યમાં નિષ્ફળ જાય છે, બધા જ ગ્રહો મનોમન મૂંઝાય છે.
અવળી મતી છે, અસ્થિર ગતિ છે!
આવી કપરી હાલતથી હારી-થાકીને બધા ગ્રહોએ ભેગા મળી એક મીટિંગ કરી.
સર્વાનુમતે નક્કી થયું— "ચાલો, આપણે આપણી આ સ્થિતિથી છુટકારો મેળવવાના ઉપાય વિશે બ્રહ્માને જઈને પૂછીએ. લાગે છે હવે આપણે પણ બ્રહ્મા પાસે જઈને કોઈ વિધિ કરાવવી પડશે!"
આમ નક્કી કરી, સૌ દોડતા-દોડતા ગયા બ્રહ્મા કને.
બ્રહ્માને એકસાથે દંડવત પ્રણામ કરીને, બેસી ગયા સૌ હાથ જોડી ડાહ્યા-ડમરા બનીને.
એકસાથે જ બોલ્યા સૌ, "ઉગારો પ્રભુ, ઉગારો અમને!"
શાંત ચિત્તે બ્રહ્માએ પૂછ્યું, "કહો વત્સ, શું થયું છે તમને?"
બધાએ એકસાથે કહ્યું, "હે પ્રભુ! ઘણા સમયથી ફરી ગઈ છે અમારી ગતિ-વિધિ. કંઈ સૂઝતું નથી અમને, ફરી ગઈ છે અમારી મતી!"
બ્રહ્માએ આંખ બંધ કરી ક્ષણમાં કર્યું નિદાન!
"બીજું કંઈ નથી થયું વત્સ, તમને બસ તમારી ભૂલ નડી છે! બીજું કંઈ નથી થયું તમને, ઓ નાદાન... તમે જેમને નડતા હતા, એ હવે તમને નડે છે! આ તો છે કર્મનો સિદ્ધાંત."
સૌ મૂંઝાયા, "પ્રભુ, કંઈ સમજાયું નહીં અમને!"
પ્રભુએ મભમમાં કહ્યું, "શાંત વત્સ, શાંત... તમારા કરતાં એ નડતર ભારે છે! એક કામ કરો તમે અત્યારે ને અત્યારે..."
બધા એકસાથે બોલ્યા, "શું કરીએ પ્રભુ?"
બ્રહ્માએ કહ્યું, "એક માણસની છબી લઈ આવો!"
બધા આશ્ચર્ય સહ બોલ્યા, "હેં!!!"
બ્રહ્માએ કહ્યું, "હા વત્સ, માણસની છબી લઈ આવો, જાઓ! અને સાથે-સાથે કોઈ સ્મશાનેથી, મસાણેથી માણસનાં થોડાં અસ્થિ પણ લઈ આવો."
"પણ પ્રભુ, મસાણેથી લાવેલા માણસના અસ્થિનું કરવાનું શું..?"
"એ જ વત્સ, એ જ જે આજ સુધી માણસો કરતા આવ્યા છે, એ હવે તમારે કરવાનું છે!"
બધા ગ્રહો મૂંઝાયા, એકબીજા સામે જોવા લાગ્યા...
બ્રહ્માજીએ ક્રોધિત થઈ કહ્યું, "તમારામાં અક્કલ નથી કે શું? સાવ માણસ જેવા શું થાઓ છો! માણસોની આંગળીમાં વીંટીની માલીપા જડાઈને રહો છો, તોય તમને એટલી પણ ખબર નથી કે મૂર્ખાઓ, માણસો તમારા નામની વીંટી બનાવતા હોય છે! હા, તો... તો શું અક્કલમઠ્ઠાઓ! હવે તમે બધા જ માણસના અસ્થિની વીંટી બનાવો! તકલીફ અમસ્તી આટલી નથી હોતી, હા, તમને 'માણસ' નામે નડતર છે મોટી!"
"જાઓ ઝટ, જઈને માણસની છબી લઈ આવો, આપણે એના ઉપર આકરી વિધિ કરવી પડશે... આમ તો માણસનું પેલા શ્વાનની પૂંછડી જેવું, વિધિ વિના એ પૂંછડી સીધી થશે નહીં!"
બધા ગ્રહો છુટકારો મેળવવા આતુર હતા 'માણસથી'.
બધા ગ્રહો એકસાથે બોલ્યા, "તો હે પ્રભુ! શું વિધિ કર્યા પછી, અને આંગળીમાં એના અસ્થિની વીંટી પહેર્યા પછી, ખરેખર ઓછી થઈ જશે અમારી ઉપાધિ?"
બ્રહ્માએ કહ્યું, "ના વત્સ ના, બહુ અઘરું છે આ માણસ નામનું પ્રાણી!"
અને પછી ખુદ બ્રહ્મા માણસજાતથી અકળાયેલા હોય તેમ ગુસ્સે થઈ બોલ્યા, "અરે! તમે આટલા બધા અકળાઓ છો શાના? જરા વિચારો... તમે માણસ નામના પ્રાણીથી આટલા દૂર રહીને પણ પરેશાન છો, તો જે એની નજીક હશે એની હાલત શું થતી હશે? 'ફલાણો ગ્રહ નડે છે, ઢીંકણો ગ્રહ નડે છે' એમ કહી-કહીને માણસ માત્ર તમને નિર્દોષ ગ્રહોને ખાલી-ખોટા બદનામ કરે છે! ખરેખર તો માણસજાત ખુદ જ પોતાને અને એકબીજાને નડે છે! અરે, આ માણસો પારકા તો ઠીક, પોતાનાને પણ નડતા હોય છે. જરા વિચારો, આ માણસ નામના પ્રાણીમાં કેટલી જડતા હોય છે! બહુ કહેવાય કે નહીં?"
આ સવાલ લઈ બધા ગ્રહો એકબીજાના મોઢા સામે જોવા લાગ્યા.
પછી બ્રહ્માને પૂછ્યું, "તો માણસની છબીની વિધિ પતી ગયા પછી શું કરવાનું હે ગુરુજી?"
બ્રહ્માએ ફરી કહ્યું, "હે મૂર્ખાઓ! તમને પહેલાં જ કહ્યું કે, વિધિ પતી ગયા પછી માણસના અસ્થિની વીંટી બનાવો, અને દસે-દસ આંગળીઓમાં ઠપકારો માણસના અસ્થિની વીંટી!"
"હા વત્સ, વીંટી! માણસના અસ્થિની વીંટી! એ પણ એક નહીં, બે નહીં, ત્રણ-ચાર નહીં... 'અનંત', દસે-દસ આંગળામાં વીંટી કરાવો યાર! તમારી બદલાયેલી ગતિ, મતી અને સ્થિતિનું કારણ બીજું કોઈ નહીં, માણસ છે માણસ! એ મૂર્ખાઓ એમ સમજે-સમજાવે છે કે તમે એમને નડો છો, 'અનંત', મગર હકીકત એ છે કે તમને બધા ગ્રહોને માણસ નડે છે, માણસ!"
@@@@@@@@@@@@@@@@@@
“અનંત”
બલાસ્ટ:
ગ્રહોને કારણે માણસોની નહીં, "અનંત",
માણસોને કારણે ગ્રહોની દશા બેઠી છે!
"અનંત"
બલાસ્ટ:
"અજ્ઞાની" માણસો હંમેશા ગ્રહોને દોષ દેતા હોય છે, પણ હકીકતમાં તો માણસોને પોતાનો સ્વભાવ અને કર્મો જ નડતા હોય છે..!
"અજ્ઞાની"
No comments:
Post a Comment